Pemprov Bali Kremasi 11 Jenazah Terlantar, Prabeya saking APBD, Per Sawa 8,5 yuta Rupiah
Kamis, 20 Juni 2024
BADUNG, Balitopnews.com - Pemerintah Provinsi Bali antuk Dinas Sosial Pemberdayaan Perempuan dan Perlindungan Anak (Dinsos P3A) Provinsi Bali nglaksanayang parikrama Kremasi jenazah terlantar maprakanti sareng RSUP Prof. DR. I.G.N.G. Ngoerah Sanglah Denpasar, magenah ring Perabuan Dharma Kerti Pura Dalem Desa Adat Kerobokan, Kecamatan Kuta Utara, Badung.
Upacara kremasi kalaksanayang 2 rahina ngawit Buda (19 Juni ) nyantos rahina mangkin Wraspati (20 Juni 2024) Sajeroning kremasi puniki, Pemprov Bali nglaksanayang kremasi 11 jenazah terlantar sane sampun ngamolihang pembebasan.
Parindikan puniki katlatarang olih Kepala Dinas Sosial Pemberdayaan Perempuan dan Perlindungan Anak (Dinsos P3A) Provinsi Bali Dr. drh. Luh Ayu Aryani, M.P., ring Denpasar, Wraspati (20/6) semeng ri tatkala nyarengin parikrama kremasi ring Perabuan Dharma Kerti Pura Dalem Desa Adat Kerobokan.
"Upacara kremasi kalaksanayang saking tanggal 19 – 20 Juni 2024 akehnyane 11 Jenazah terlantar sane sampun ngamolihang pembebasan mangda sida kakremasi. Prabea kremasi soang-soang sawa agengnyane Rp. 8.500.000 makasami mawit saking Anggaran Pendapatan Belanja Daerah (APBD) Provinsi Bali," baos dane.
Aryani maosang, antuk nglaksanayang kremasi kaaptiang mangda sang palatra sida nunggal ring Sangkan Paran dumadi, nyuciang atma saking jatma sane sampun padem miwah digelis nuju sunia loka.
Tiosan punika, Plt. Direktur Layanan Operasional RSU Prof Ngoerah
I Gst Ngurah Ketut Sukadarma nampenin gatra ring media nganinin indik prabea nelasang Rp. 1.9 Miliar. Kapanggihin rikala upacara kremasi, dane maosang indik prabea upacara kremasi ring Dharma Kerti Pura Dalem Desa Adat Kerobokan puniki makasami mawit saking Pemerintah Provinsi Bali.
"Sapuniki Rp. 1.9 Miliar punika ngingkupin prabea penitipan jenazah ring rumah sakit, nenten 11 jenazah puniki kemanten, samaliha wenten 5 jenazah tiosan sane sampun kaambil mangda sida kapendem olih yayasan islam. Punika sampun ngranjing prabea duk karawat taler prabea penitipan jenazah santukan wenten saking warsa 2022 tur sane paling akeh warsa 2023. Manut administrasi punika wenten prabeanyane, dadosnyane kirang langkung ageng prabeanyane Rp. 1.9 Miliar. Titiang taler negesang, indik prabea makasami upacara kremasi puniki mawit saking Pemerintah Provinsi Bali," paweweh dane. (Rls/Btnc)
Komentar