Ngrauhin Gudang Logistik BPBD Bali, Sekda Dewa Made Indra Mastikayang Penanganan Mamargi Antar tur Layanan BPBD Nenten Terganggu
Rabu, 26 Juni 2024
DENPASAR,Balitopnews.com - Sekretaris Daerah Provinsi Bali Dewa Made Indra mastikayang pelayanan BPBD Bali nenten keni gangguan sasampun keni baya kebakaran Buda (26 Juni 2024). “Pelayanan nenten dados terganggu,” baos Sekda Dewa Indra ri tatkala mastikayang genah kebakaran Buda sore. Dane mapinunas mangda gelis katanganin sasampun kebakaran minakadi koordinasi sareng Dinas Kesehatan antuk migunayang gudang logistik druen Kementerian Kesehatan sane wenten ring Kuta. BPBD Bali taler kanikain nglaksanayang koordinasi sareng Dinas PUPR nganinin indik pengecekan struktur gedung sasampun kebakaran sapisanan pangrencana pawangunan gedung antuk mekanisme pergeseran anggaran sane mendesak.
Sadurungnyane Kepala Pelaksana BPBD Provinsi Bali I Made Rentin sajeroning keterangan persnyane majeng awak media nlatarang kronologi kebakaran sane ngamusnayang lantai dua gudang logistik punika.
Katlatarang olih Made Rentin, baya punika pinih riin kaktanenang olih Sekretaris BPBD Bali I Gede Agung Teja Bhusana Yadnya kasarengin adiri staf miwah satpam sane ngantenang wenten andus saking asap pada gedung lantai dua punika. Tigang diri personil BPBD raris mautsaha mademang api antuk Alat Pemadam Api Ringan (APAR). “Ipun mungkah pintu gelis nuju genah api ring lantai dua, santukan andus sampun tebel, APAR nenten efektif raris titiang ngontak Damkar Kota Denpasar,” baos dane. Kirang saking limang menit, Damkar Kota Denpasar nedunang tigang armada mawinan api prasida kapademang 1 jam 20 menit. “Pemadaman api sampun wusan pukul 13.20 wita nenten jantos ngeniang lantai satu".
Patut kauningin rikala punika gudang kantun puyung santukan samian personil Tim Reaksi Cepat (TRC) BPBD Bali ngamargiang pelatihan simulasi tanggap darurat ring Margarana, Tabanan
Salanturnyane Made Rentin nguningayang, kerugian saking kebakaran katarka nyantos Rp. 7,9 miliar. “Kerugian sampun titiang inventarisir. Gedung katarka makatah Rp. 1 miliar miwah logistik sane puun Rp. 6,9 miliar,” baos dane. Katarka, kebakaran mawit saking latun api sangkaning korsleting listrik. “Punika panarka santukan instalasi listrik ring gudang logistik sampun sue yusannyane. Api digelis ngagengang santukan ring gudang akeh material sane mudah terbakar sakadi kasur miwah masker saking donatur rikala penanganan Covid-19, makehan saking Temasek Singapura,” baos dane. Dane taler ngangeknin pikobet puniki sangkaning musibah saha nenten wenten kecurigaan majeng sapa sira ugi.
Salanturnyane, BPBD Bali oacang uleng ring penanganan miwah mareresik wusan musibah kebakaran puniki. Sairing ring parindikan punika, Kalaksa BPBD Bali sampun ngawentenang koordinasi sareng BPKAD indik status asuransi gedung sane puun. “Titiang pacang ngecek napikeh gedung puniki kaasuransiang. Yening wenten, yening wenttsinah becik kalanturang,” paweweh dane.
Ring galah tiosan, Made Rentin taler nguningang BPBD Bali sampun ngwentenang pamgrencana renovasi majeng gudang logistik punika. “Gudang punika sampun sue, kawangun warsa 2013 antuk bantuan Kemendagri. Titiang sampun masadok sareng Bapak Sekda miwah Pak Gubernur raris polih rekomendasi renovasi total".
Pinaka pamuput, Made Rentin negesang musibah kebakaran prasida metu ring galah lan genah sane nenten prasida katarka. Punika mawinan dane mikelingin inggian mitigasi bencana kebakaran utaminyane ring gedung perkantoran. Sedeng becik, Rentin maosang, tanggal 26 nyabran bulan kapingetin pinaka Hari Simulasi Bencana (HSB). “Nah, rahina mangkin tanggal 26 raris titiang polih musibah sane nyata, nenten wantah marupa simulasi. Musibah puniki nenten prasida katolak utawi karencanayang,” dane nlatarang.
Pikobet puniki pinaka pangajah ajah majeng BPBD miwah makasami angga Pemprov Bali mangda ngecek kawentenan gedung utama instalasi listrik miwah peralatan kebencanaan sakadi APAR. Katlatarang antuk Rentin, wenten tigang parindikan sane patut kauratiang sajeroning mitigasi inggih punika simulasi kerja personil, kelistrikan miwah pengecekan APAR. “Sane nomor kalih sareng tiga sering nenten kauratiang, nanging mabuat pisan,” baos nyane. Made Rentin raris mawali mikelingang layanan BPBD Bali nenten keni gangguan antuk bencana kebakaran puniki.(Rls/Btnc)
Komentar