Sekda Dewa Indra Nyokong Kebijakan Hilirisasi Strategis Sektor Kelautan miwah Perikanan Bali
Kamis, 04 Juli 2024
BADUNG, Balitopnews.com - Kebijakan hilirisasi ring sektor perikanan miwah kelautan pacang ngicenin iusan positif majalaran antuk nincapang pangargan produk, nglimbakang industri pengolahan, penyerapan tenaga kerja, miwah adopsi teknologi taler nyokong ketahanan pangan.
Indik punika katlatarang olih Sekretaris Daerah Provinsi Bali Dewa Made Indra ri tatkala ngrauhin Rapat Koordinasi Daerah Kajian Hilirisasi Investasi Strategis Sektor Perkebunan, Kelautan, Perikanan miwah Kehutanan Tahun Anggaran 2024 ring Kuta Beach Heritage Hotel, Badung rahina Wraspati (4 Juli 2024) semeng.
"Manut titiang, sektor hilirisasi sane strategis ring Bali inggih punika sektor kelautan miwah perikanan. Sektor kelautan miwah perikanan, komoditas sane strategis ring Bali inggih punika udang. Kawentenan tambak udang ring Bali akeh pisan. Sapunika taler ikan tuna. Cakalang miwah tuna sane sampun kaekspor miwah kaajeng. Tiosan punika bulung utawi rumput laut miwah uyah utawi tasik taler potensial ring Bali," baosnyane.
Potensi ageng punika, akehan kaekspor mawentuk utuh beku miwah segar, nanging sane mawentuk olahan kantun akidik, sane kaekspor mawentuk ikan utuh taler rantai pasoknyane ring hulu durung mamargi becik, mawinan akeh tangkapan nelayan nenten prasida ngranjing ring industri pengolahan antuk momot sane becik.
Sekda Dewa Indra taler ngaturang suksma antuk kawentenan Rapat Koordinasi Daerah Kajian Hilirisasi di Provinsi Bali sane kaaptiang prasida ngicen pangenjuh becik majeng pemerintah sane kaaptiang prasida nyokong sektor kelautan miwah perikanan sajeroning panglimbaknyane mangda prasdia maksimal.
"Kebijakan hilirisasi ring sektor perikanan miwah kelautan mangda ngamedalang iklim investasi sane kondusif. Mapaiketan ring parindikan punika, titiang ngaptiang acara puniki prasida ngicen rumusan kebijakan hilirisasi investasi strategis utaminyane majeng sektor perikanan miwah kelautan sane prasida kaanggen olih pemerintah sajeroning nglimbakang sektor perikanan miwah kelautan," paweweh dane .
Samalihnyane, Staf Khusus Bidang Hubungan Komunikasi Kelembagaan Kementerian Investasi, Arnanto Nurprabowo maosang Rapat Koordinasi puniki pinaka eedan saking makudang rapat koordinasi sane kamargiang Kementerian Investasi sajeroning midabdabin kajian Hilirisasi warsa 2024.
Kebijakan hilirisasi ring sektor perikanan miwah kelautan pacang mawasana positif antuk nincapang pangargan produk, panglimbak industri pengolahan, nyerap tenaga kerja, miwah adopsi teknologi saha nyokong ketahanan pangan.
"Program hilirisasi sane kadabdabang Pemerintah kaaptiang prasida dados produk sane maderbe nilai tambah miwah lapangan kerja sane nincap. Titiang nabdabang peta jalan hilirisasi strategis sane ngunggahang 28 komoditas ring makudang sektor," baos dane sinambi ngwewehin parikrama Rakorda prasida ngicen pangenjuh, pangweruh miwah pengalaman lapangan sajeroning nglimbakang penyusunan kajian hilirisasi 2024.
Kala punika taler karauhin antuk, Kepala DPMPTSP Provinsi Bali I Wayan Sumarajaya miwah Kadis Kelautan dan Perikanan Provinsi Bali I Putu Sumardiana. (Rls/Btnc)
Komentar