Pemprov Bali Baksos Ngrombo Sareng Ormas Sasar Veteran, Anak Yatim miwah Penyandang Disabilitas
Jumat, 05 Juli 2024
DENPASAR, Balitopnews.com - Pemprov Bali antuk Badan Kesatuan Bangsa dan Politik (Kesbangpol) rutin nglaksanayang parikrama Bakti Sosial (Baksos) sane nyarengang Ormas. Ngranjing ring minggu kaping-39, baksos ngrombo sareng Ormas kamargiang rahina Sukra (5 Juli 2024) ring halaman Kantor Kesbangpol Provinsi Bali. Panguleng baksos puniki majeng ring veteran pejuang kemerdekaan, anak yatim piatu, penyandang disabilitas miwah sang sane sinengkaon.
Antuk semangat Ngrombo, pengurus miwah anggota saking makudang Ormas rauh ka Kantor Kesbangpol Bali. Ipun makta barang-barang sane pacang kadonasiang majeng kelompok sasaran sane karauhang rikala acara punika. Tiosan donasi marupa sembako sakadi beras, minyak, mi instan, gula, teh miwah kopi, pengurus miwah anggota Ormas sane doh saking Kintamani taler nyumbangang sayur pikolih ring tegal ipune. Sumbangan punika raris kakepah dados paket bingkisan sane kasukserahang majeng kelompok sasaran baksos.
Kepala Badan Kesbangpol Provinsi Bali, I Gusti Ngurah Wiryanata sajeroning sambrama wacanan dane ngaturang suksma majeng pengurus miwah anggota Ormas sane sampun nyelagang galah rauh ring parikrama baksos ngrombo. Manut dane, Pj. Gubernur Bali nyanggra becik baksos ngrombo kasarengin Ormas. "Bapak Pj. Gubernur nunas parikrama sakadi puniki mangda nglantur kamargiang," baos dane.
Salanturnyane, ipun taler nyuksemayang parikram puniki sampun kasanggra becik antuk angga Ormas. "puniki wantah parikrama sane ka ping-39. Yening dadosang jinah, sumbangan puniki samaian sampun makatah Rp. 2 miliar" baos dane kasanggra antuk tepuk tangan olih uleman sane rauh.
Kantun ring sambrama wacanan dane, Ngurah Wiryanata ngunggahang indik bulan kebangsaan ngawit tanggal 1 nyantos 31 Agustus 2024. "Titiang polih amongan ngamargiang bulan kebangsaan sane matetujon numbuhang rasa patriotisme miwah kebanggaan ring Ideologi Pancasila. Ipun ngaptiang, makasami Ormas sareng nyuksesang pamargin bulan kebangsaan majalaran makudang kudang parikrama sane mapaiketan ring tatujon patitis rahina punika.(Rls/Btnc)
Komentar