Balitopnews.com, Buleleng 

Gubernur Bali, Wayan Koster kasarengin Ibu Putri Suastini Koster miwah okannyane sane kapertama Ni Putu Dhita Pertiwi, rahina Buda (17 April 2019) semeng nganggen hak pilihnyane ring TPS 11 Desa Sembiran, Tejakula, Buleleng. 

 

Neked ring genah pencoblosan jam 9.40 Wita, sapangrauh Gubernur Koster kasanggra olih Perbekel Desa Sembiran, I Nengah Sariada sane  salanturnyane ngamargiang pendaftaran miwah nentuang hak pilih dane ring ungkur bilik suara kasarengin olih Ibu Putri Suastini Koster miwah I anak Ni Putu Dita Pertiwi. 

 

Ring galah sane pateh, Gubernur Koster nganikayang makasami kramane sane madruwe hak suara milih Presiden miwah Wakil Presiden, DPD RI, DPRD Provinsi, DPRD Kabupaten/Kota. Dane mapangapti mangda pemilu 2019 puniki mrasidang mamargi antar, damai, aman miwah lancar. Koster sane taler pinaka ketua DPD PDI Perjuangan Provinsi Bali puniki mapinunas majeng ring krama mangda satata mengawal/ngemit pamargin pemilu serentak 2019 mangda becik tur kondusifitas Bali mrasidang kakemit. Dumogi krama Bali mrasidang ngawigunayang tur bebas ngangge hak pilihnyane anggen nentuang pemimpin bangsa iragane kapungkur wekas," kadi asapunika baos dane Wayan Koster. 

 

Antuk rauh ke Genah Pemungutan Suara (TPS) miwah nganggen tur ngawigunayang hak politik madasar upaya sane bertanggung jawab, antuk punika manut dane Koster pacang ngawinang indeks demokrasi ring Bali sayan ngamecikang. "Titiang mapangapti mangda kramane ring Bali makasami rauh ke TPS nganggen hak pilihnyane mangda target partisipasi pemilih ring Bali 80% (ulung dasa persen) mrasidang kapanggih pinaka wentuk kontribusi politik ring sajeroning berdemokrasi anggen milih pemimpin iraga 5 (limang) warsa kapungkur wekas puniki," kadi punika teges dane. 

 

Manut data sane kakeniang, Daftar Pemilih Tetap (DPT) ring TPS 11 sane magenah ring Kantor Perbekel irika akehnyane 299 (satak sia dasa sia) diri. Sakemaon kawentenan DPT ring Desa Sembiran akehipun 4.308 (petang tali tigang atus kutus) diri, inggian wenten 1 (siki) pemilih wantah tuna daksa.  (Balitopnews.com / Amo Bali )