Pamikukuhan Gedung MDA Karangasem, Gubernur Koster Nyarengang Desa Adat Makarya Antuk Progresif Ngamargiang Perda Desa Adat ring Bali
- 27 April 2021
- 15:04 WITA
- News
KARANGASEM, Balitopnews.com - Gubernur Bali Wayan Koster nyarengang Majelis Desa Adat (MDA) miwah Bendesa Adat ring Kabupaten Karangasem mangda ngamargiang sabecik-becikne daging Perda Nomor 4 Warsa 2019 nganinin indik Desa Adat ring Bali sajeroning nglimbakang adat, agama, tradisi, seni wiadin budaya, miwah kearifan lokal nganutin sareng visi Nangun Sat Kerthi Loka Bali melarapan antuk Pola Pembangunan Semesta Berencana nyujur Bali Era Baru.
Parindikan punika kabaosang ri kala pamargin Upacara Pamelaspasan miwah palinggatanganan prasasti pinaka cihna kapikukuhangnyane Gedung MDA Kabupaten Karangasem nepet ring rahina Purnama Jyestha, Soma Paing Langkir tanggal 26 April 2021.
Ring ajeng Bupati Karangasem, Gede Dana, Bendesa Agung MDA Provinsi Bali, Ida Pangelingsir Agung Putra Sukahet, Kepala Dinas Pemajuan Masyarakat Adat Provinsi Bali, I Gusti Agung Ketut Kartika Jaya Seputra, miwah pecak Bendesa Agung Majelis Utama Desa Pakraman Provinsi Bali, Jro Gede Suwena Putus Upadesa, Gubernur Bali maosang utsaha sajeroning midabdabin Majelis Desa Adat Kabupaten/Kota sajebag Bali durung puput, saantukan sesampune pewangunan puniki kantun wenten sarana panyokong tiosan sane patut kategepin mangda MDA Kabupaten/Kota sajebag Bali prasida makarya, ngicen ayah-ayahan majeng krama.
“Melarapan antuk punika Desa Adat sane pinaka tetamian leluhur prasida rajeg kawentenannyane, mawinan sangkaning punika tiang ngaptiang ring MDA Kabupaten/Kota sajebag Bali makarya saha ngawigunayang Gedung MDA puniki sabecik-becikne,” baos Gubernur Bali saking Desa Sembiran, Buleleng puniki sinambi nyarengang Desa Adat mangda aktif, progresif sajeroning ngamargiang Perda Nomor 4 Warsa 2019 nganinin indik Desa Adat ring Bali, nglestariang budaya Bali wiadin nyayubin palemahan Bali.
Tiosan punika ring panglimbaknyane, Gubernur Bali Wayan Koster ring pangawit warsa 2021 sampun prasida ngamikukuhang 5 Gedung MDA Kabupaten/Kota ring Bali minakadi 1). Gedung MDA Kabupaten Gianyar; 2). Gedung MDA Kabupaten Jembrana; 3). Gedung MDA Kabupaten Tabanan; 4). Gedung MDA Kabupaten Buleleng; miwah 5). Gedung MDA Kabupaten Karangasem.
Kawentenan Gedung MDA puniki pinaka cihna kasumekenan Gubernur Koster sane taler pinaka Ketua DPD PDI Perjuangan Provinsi Bali sajeroning ngukuhang kawentenan Adat, Agama, Tradisi, Seni, Budaya wiadin budaya Lokal Bali. Tiosan punika, pecak Anggota DPR-RI 3 Periode saking Fraksi PDI Perjuangan puniki sajeroning ngwangun Gedung MDA Provinsi/Kabupaten/Kota sajebag Bali nuekang yening nenten nganggen dana APBD.
Nanging Wayan Koster ring ajeng Bendesa Adat ring Karangasem maosang yening Dane ngwangun Gedung MDA antuk nganggen jaringan ring Pusat wiadin manggalaning BUMN.
Mawinan sangkaning punika, majeng pewangunan Gedung MDA Kabupaten Karangasem sane kawangun ring tanah duwen Pemerintah Provinsi Bali sane jimbarnyane 8,7 are, antuk wewangunan kalih lantai sane jimbarnyane 307.05 M2 antuk arsitektur Bali puniki nelasang prabea Rp 3,3 milyar sane mawit saking dana Corporate Social Responsibility (CSR) saking PT. Pelindo III (Persero), PT. Telkom Indonesia (Persero) Tbk, miwah PT. Jasa Raharja (Persero).
Petajuh Bidang Kelembagaan dan Sumber Daya Manusia MDA Provinsi Bali, I Made Wena sane ngangganin Bendesa Agung MDA Provinsi Bali, Ida Pangelingsir Agung Putra Sukahet ngaturang suksma dahat majeng Gubernur Bali, Wayan Koster sane sampun sumeken sajeroning nyaga karajegan Desa Adat melarapan antuk pewangunan Gedung MDA Provinsi Bali rauhing ring pewangunan Gedung MDA ring Kabupaten/Kota sajebag Bali mawinan kawentenannyane megah sekadi mangkin.
"Nembe madue Gubernur Bali sekadi Wayan Koster sane sumeken nguratiang kawentenan Desa Adat, saha puniki pinaka pangapti sareng sami ngawit ring kapamucukan Bendesa Agung Majelis Utama Desa Pakraman Provinsi Bali, Jro Gede Suwena Putus Upadesa sane wau mangkin prasida kakardinin,” baosnyane.(gix)
Komentar