Kasi Humas Polres Tabanan Masimakrama Sareng Ketua Pewarta Sajeroning Ngardi Komunikasi Publik Sane Sayan Becik
- 22 November 2021
- 22:11 WITA
- News
TABANAN,Balitopnews.com - Antuk sauninga olih Kapolres Tabanan AKBP Ranefli Dian Candra, S.I.K., M.H., Kasi Humas Polres Tabanan Iptu I Nyoman Subagio, ring rahina Soma tanggal 22 Nopember 2021 sore, nglaksanayang simakrama sareng Ketua Pewarta Tabanan I Made Donny Darmawan, S.S ring Kantor media online Balitopnews.com ring Desa Bongan, Tabanan.
Ring galahe punika Kasi Humas Polres Tabanan nguningayang yening sajeroning nincapang prakanti utaminipun komunikasi sane selami puniki majanten sampun becik, gumaninnyane mangda antuk sinarengan nambakin kawentenan gatra hoax, napi malih sane prasida ngaonang katreptian Kamtibmas. "Inggian gatra sane wenten ring media online wiadin media sosial, ngiring sareng-sareng nureksain,"baos Kasi Humas Polres Tabanan.
I Made Donny Darmawan S.S. pinaka Ketua Pewarta sepisanan pinaka owner Media Online Bali Top News maosang, jagi setata nyokong kawentenan Program Pemerintah utaminipun sajeroning nyaga katreptian krama melarapan media. " Selami ngamargiang swagina, majanten jagi setata nganutin geguat perundang-undangan sane wenten, nyarengin ngwangun wangsa wiadin panegara utaminipun ring Kabupaten Tabanan melarapan antuk nguratian etika kalih estetika sekadi sane munggah ring kode etik jurnalistik," baos I Made Doni Darmawan. (Md/rls)
Komentar