PJ Gubernur Mahendra Jaya Ngrauhin Rakornas Pengamanan Pasokan lan Harga Pangan Nyanggra HBKN
- 04 Maret 2024
- 18:03 WITA
- News
JAKARTA, Balitopnews.com - Penjabat (Pj.) Gubernur Bali S.M. Mahendra Jaya ngrauhin Rapat Koordinasi Nasional (Rakornas) Pengamanan Pasokan lan Harga Pangan ring Ballroom Hotel Kempinski, Jakarta, Soma Kliwon Kuningan (4 Maret 2024). Rakornas kamanggalain Menteri Dalam Negeri, M. Tito Karnavian maosang utsaha pidabdab stabilitas pasokan lan pangargan pangan nyanggra Hari Besar Keagamaan Nasional (HKBN), Ramadhan lan Idul Fitri 1446 H Warsa 2024.
Sakadi kategesang antuk Mendagri, gubernur pinaka Ketua Tim Pengendalian Inflasi Daerah (TPID) mangda gagelisan mastikayang kawentenan lan pangarga barang sane murah majeng kramane. “Punika taler bupati lan walikota sajebag Indonesia mangda mautsaha nabdabang kawentenan pangan tur ngrembugang sareng Forum Komunikasi Pimpinan Daerah (Forkopimda) ring wewidangan soang-soang,” baos Mendagri Tito.
Kepala Badan Pangan Nasional (Bappanas) Arief Prasetyo Adi maosang, Rakornas kamargiang nginutin piteket Presiden Joko Widodo sane nitahang Bappenas terus nyaga pangan apang setata ada tur pangarganne mudah nyanggra HBKN Idul Fitri. “Taler pinaka utsaha ngwentuk sinergi ring kementerian lan lembaga bidang pangan, kepala daerah sajebag Indonesia, kantos pelaku usaha anggen negdegang pangargan pangan, nenten meratin petani, pengusaha, lan krama,” baos Arief Prasetyo.
Rakornas sane kamargiang olih Badan Pangan Nasional puniki ngulemin makudang-kudang stakeholder, rumasuk Kemenko Perekonomian, Kementerian Pertanian, Kementerian Perdagangan, Kementerian BUMN, Kementerian Perhubungan, Bank Indonesia, Mabes Polri, Perum Bulog, Badan Pusat Statistik, kepala daerah sajebag Indonesia, pengusaha, lan asosiasi bidang pangan taler siosan. (Rls/Btnc)
Komentar