Layanan Data Selulér lan IPTV Kamatiang Kala Nyepi 2024
- 08 Maret 2024
- 23:03 WITA
- News
DÉNPASAR Balitopnews.com – Pateh sakadi pamargi warsa sané lintang penyelenggara télékomunikasi sané nyediaang layanan data selulér lan IPTV (Internet Protocol Television) ngmatiang layanan ri kala rahina Nyepi Saka 1946, Soma Paing Langkir, 11 Maret 2024. Indiké puniki kauningang olih Kepala Dinas Komunikasi, Informatika dan Statistik Provinsi Bali, Gedé Pramana, Sukra Wagé Kuningan, Jumat (8 Maret 2024).
Dané ngungingang pamargu puniki wantah kebijakan nyabran warsa sané kamargiang olih Pemerintah Provinsi Bali, pangaptiné pamargi Nyepi mamargi rahayu. Pamutus puniki kadukung antuk Surat Édaran Menteri Komunikasi dan Informatika Republik Indonésia Nomor 2 Tahun 2024 tentang Imbauan untuk Melaksanakan Seruan Bersama tentang Pelaksanaan Rangkaian Hari Raya Suci Nyepi Tahun Baru Caka 1946 Provinsi Bali Tahun 2024 tanggal 5 Maret 2024 lan Seruan Bersama Majelis-Majelis Agama dan Lembaga Sosial Keagamaan Provinsi Bali Tahun 2024 tentang Pelaksanaan Rangkaian Hari Raya Suci Nyepi Tahun Caka 1946 tanggal 2 Fébruari 2024.
Layanan data seluler lan IPTV kamatiang ngawit rahina Soma, 11 Maret 2024 kantos bénjang semengné. “Penyedia utawi provider jasa selulér ngmatiang data selulér, IPTV, lan makasami penyedia jasa televisi tur radio nénten siaran utawi nyobiahang siaran ngawin rahina Soma tanggal 11 Maret 2024 pukul 06.00 WITA kantos rahina Anggara 12 Maret 2024 pukul 06.00 WITA,” baos Gedé Pramana.
Dané ngwewehin layanan data ring objek vital sakadi rumah sakit, kantor kepolisian, militér, BMKG, BPBD, Basarnas, bandara, pemadam kebakaran, lan layanan kepentingan umum tiosan tetep kamargiang. Layanan telépon, SMS, lan fiber optik tetep dados kawigunayang salami rahina Nyepi mangda layanan genting utawi émergensi prasida mamargi. Pamargi puniki kamargian anggén nulak hoax lan kontén negatif. “Tiang ngaptiang pamargi rahina Nyepi warsa puniki mamargi rahayu,” baos Gedé Pramana. (Rls/Btnc)
Komentar