Dekranasda Bali Nglaksanayang Wimbakara Desain Tas Mawit Saking Ulat-Ulatan
Rabu, 10 Juli 2024
DENPASAR,Balitopnews.com – Dekranasda Provinsi Bali nglaksanayang wimbakara desain tas mawit saking ulat-ulatan magenah ring Ruang Sarasehan, Gedung Ksirarnawa, Art Centre Taman Budaya Denpasar ring rahina Buda (10 Juli 2024) semeng.
Pj. Ketua Dekranasda Provinsi Bali, Ny. drg. Ida Mahendra Jaya maosang wimbakara desain tas sane mawit saking ulat-ulatan puniki wantah silih tunggil wentuk utsaha Dekranasda Provinsi Bali sane maprakanti sareng Pemerintah Provinsi Bali mangda setata nyokong kreativitas miwah inovasi pengrajin kriya anyaman sane wenten ring Bali. “Tas anyaman utawi ulatan nenten wantah produk kemanten, sakewanten prasida kasengguh karya seni sane nyihnayang budaya miwah kearifan lokal Bali,” baos Ida Mahendra Jaya.
Majalaran antuk parikrama punika kaaptiang mangda para pengrajin miwah pelaku UMKM/IKM ring Bali prasida sayan semangat ngnggen makatah teknik miwah desain, majanten prasida ngawetuang produk-produk sane nenten wantah kakantenang becik, taler madue nilai jual tinggi ring pasar nasional bilih-bilih internasional.
“Titiang bangga pisan manggihin antusiasme miwah partisipasi saking para perajin miwah UMKM sajeroning wimbakara puniki. Indike puniki nyihnayang iraga madue potensi jagi nglimbak miwah masaing ring dunia industri kreatif,”.
Pj. Ketua Dekranasda ngaptiang kriya anyaman Bali prasida nglimbak miwah lestari sah prasida ngicen iusan becik majeng kemajuan ekonomi kreatif ring Provinsi Bali.
Samalihnyane, Kepala Dinas Perdagangan dan Perindustrian Provinsi Bali, I Wayan Jarta sajeroning sambrama wacanan dane maosang wimbakara kriya anyaman 2024 kamargiang pinaka wimbakara pakaryan hand bag utawi tas wanita majeng pengrajin miwah IKM sajeroning nyokong kreativitas miwah eksplorasi teknik saha desain ring baga kriya anyaman ring Provinsi Bali. Kawewehin malih pamilet sane nyarengin wimbakara puniki wantah 16 pengrajin miwah IKM sane mawit saking Kabupaten/Kota se-Bali. “Pj. Ketua Dekranasda Provinsi Bali sane midabdabin wimbakara puniki,” baos Wayan Jarta.
Kakantenang ring parikrama punika, Pj. Ketua Dekranasda Provinsi Bali, Ny. drg. Ida Mahendra Jaya kasarengin antuk 3 dewan juri nureksain kerajinan pamilet wimbakara sane mawit saking tuntunan Dekranasda Provinsi Bali rikala ipun nlatarang tas pakaryan ipun.
Mawit saking panureksan dewan juri jayanti 1 kapolihang IKM Rotenbi saking Kabupaten Bangli, jayanti 2 kapolihang antuk IKM Feodora Bali saking Kabupaten Gianyar miwah jayanti 3 kapolihang antuk Klaceng Handycraft saking Kabupaten Buleleng. Sapunika taler panyukserahan piala miwah hadiah wimbakara pacang kamargiang rikala acara panyineb PKB kaping XLVI Tahun 2024 tanggal 13 Juli 2024 sane jagi rauh. (Rls/Btnc)
Komentar