Kantor Staf Presiden Ngrauhin Pemprov Bali Sajeroning Verifikasi Lapangan Indik Makudang-kudang Wicara ring Bali
Jumat, 12 Juli 2024
DENPASAR,Balitopnews.com - Tim Kedeputian V Kantor Staf Presiden (KSP) sane kapucukin olih Deputi V KSP Irfan Pulungan ngawentenang Verifikasi Lapangan Situasi Provinsi Bali. Rapat Verifikasi punika kamargiang ring Ruang Rapat Wiswa Sabha Pratama, Kantor Gubernur Bali, Denpasar rahina Sukra (12 Juli 2024)
Parikrama rahina semeng punika karauhin antuk makudang stakeholder sekadi OPD ring kakuwuban Pemprov Bali, Kantor Wilayah Kemenkumham Bali, Jajaran TNI/Polri Provinsi Bali, jantos Kementerian Perekonomian dan Pariwisata RI.
Manut Irfan Pulungan, wenten tigang wicara strategis sane dados uratian ring pangrauh puniki, indik pidana narkotika, over kapasitas lembaga pemasyarakatan, miwah keamanan lan ketertiban masyarakat inggian konteks warga asing. “Majeng tigang wicara punika, sane ka pertama sampun kaverifikasi ka Lapas Kerobokan Bali miwah ka BNNP Bali, mawinan kunjungan rahina mangkin sulengnyane ring verifikasi keamanan miwah ketertiban utaminyane warga asing,” baos dane.
Dane ngangkenin makudang pangenjuh sampun kaicenin, pikolih paruman indik wicara punika pacang karauhang ring Kepala Staf Khusus Presiden Dr. Moeldoko, mangda kalanturang majeng bapak Presiden RI Ir. Joko Widodo. Dane ngwewehin "Titiang ngaptiang wenten pasadok utawi laporan miwah pangenjuh mangda titiang prasida nepasin indike punika".
Samalihnyane Asisten Pemerintahan dan Kesejahteraan Rakyat Setda Provinsi Bali Dewa Gede Mahendra Putra, ngaturang suksma majeng pangrauh rahina mangkin. Dane maosang pidabdab puniki pinaka cihna uratian pemerintah pusat majeng kawentenan Bali.
Indik wicara keamanan miwah ketertiban sane ngindikang warga asing, dane ngangkenin angganyane sampun ngamargiang Tindakan pencegahan nyantos penindakan majeng warga asing punika. Pemprov Bali sampun ngalaca-laca parindikan napi kemanten sane dados utawi tan dados kamargiang ring Bali (Do’s and Don’ts), bilih dane taler sampun ngwentuk Satpol PP Pariwisata sane nyobiahang awig-awig punika majeng wisatawan.
Dane taler mapangapti rerincikan sane kaembasang sajeroning paparuman semeng punika prasida dados sepat siku-siku olih Pemprov Bali sajeroning ngicen tetibak majeng wisatawan.
Makudang kudang pangenjuh sane kaembasang ring parum punika prasida kacutetang inggian penanganan situasi keamanan miwah ketertiban masyarakat sane metu sangkaning parilaksanan WNA ring Bali muatang pendekatan sane holistik miwah terintegrasi ring sajebag tingkat pemerintah, yata ring daerah nyantos pusat. Punika mawinan ring galah sane jagi rauh komunikasi, koordinasi miwah kolaborasi pantaraning stakeholder yata instansi vertikal utawi horizontal pacang satata kautsahayang sajeroning nambakin pikobet punika.(Rls/Btnc
Komentar