Ngawentenang Harkamtibmas Nuju Pilkada Serentak, Polda Bali Ngrauhin Diskominfos Bali
Selasa, 16 Juli 2024
DENPASAR,Balitopnews.com - Nyanggra Pemilihan Kepala Daerah (Pilkada) Serentak 2024, Kepolisian Daerah (Polda) Bali setata mautsaha nyaga keamanan ring Provinsi Bali mangda tetep trepti.
"Sajeroning ngawentenang indike punika, titiang maprakanti sareng stakeholder sane mapaiketan silih tunggilnyane Dinas Kominfos Provinsi Bali," baos Kasubdit I Ditintelkam Polda Bali AKBP I Wayan Sumara, S.Sos., M.Si, wusan nglaksanayang parum sareng Sekretaris Dinas Kominfos Provinsi Bali Drs. I Dewa Rai Rustina, M.Si, Anggara (16 Juli 2024).
Parum sajeroning mingetin Harkamtibmas (Pemeliharaan Keamanan Ketertiban Masyarakat) puniki taler kalaksanayang ring Warung Be Sanur, Jalan Tantular No. 99, Renon, Denpasar.
AKBP Wayan Sumara ri tepengan punika maosang, Polda Bali mapangapti mangda panglimbak kahanan miwah gatra-gatra sane viral inggian punika hoaks wiadin real setata kasobiahang olih Diskominfos.
Duaning asapunika aparat kepolisian prasida mengambil panepas mangda nenten dados ancaman kamtibmas nuju Pilkada serentak 2024.
"Yadiastun wicara alit, sane nglimbak ring masyarakat yadin ring media sosial, mangda Diskominfos prasida nyadokang ring titiang," baosnyane.
Nampenin indike punika, Dewa Rai Rustina pinaka pengelola Komunikasi dan Informasi Statistik, maosang anggannyane taler nyaring makasami informasi sane nglimbak ring masyarakat miwah media sosial sane prasida ngawetuang biuta.
"Titiang sering nglaksanayang patroli ciber antuk ngawigunayang bidang persandian Dinas Kominfos, taler maprakanti sareng instansi sane mapaiketan nureksain gatra hoax sane prasida ngawinang gangguan Kamtibmas," baos dane.
Dewa Rai ngwewehin, Kominfos nyuksemayang jajaran Polda Bali antuk Ditintelkam sane dahat intensif nglaksanayang sinergitas.
"Dumogi sinergitas puniki ngalantut nyantos ring tingkat kabupaten/kota se-Bali, mangda prasida nepasin potensi ancaman gangguan Kamtibmas pamekasnyane antuk media sosial," paweweh dane.(Rls/Btnc)
Komentar